يارب

يارب..ياللي عمري ما مديتلك إيدي و كسفتني..بتستجيبلي في كل دعوة بطلبها منك حتى ولو بعد حين..و لما بتستجيبلي بفرح و ساعات بنسى أشكرك..وبعدين أفتكر و اضحك و أبص للسما و أقولك ما أنت عارف يارب إني بحبك..فبحسك بتطبطب عليا بإيدك الرحيمة و تقولي عارف..و أجري أفرح بنعمتك عليا و بعدين أزعل..فاناديك فتنصفني فأبص للسما و ابعتلها بوسة..فتبتسم و تسيبني أفرح..

يارب انا عملت حاجات كتير اوي غلط في حياتي..ذنوب محدش يعرفها غيرك..و كدبت و زعلت أمي و أبويا..و فقدت ساعات ثقتي فيك..و زعلت منك..و راضيتني..و زعلت ناس..فراضيتهم عني..و بعدين رجعت خبطت على بابك ففتحتلي..و ادتني نعمة الاهل اللي بيحبوني..و نعمة  الأصحاب اللي سندوني..و نعمة التخفيف من الوجع..ونعمة الضحك اللي بيطلع في ساعة الحزن عشان إنت عارف إن الحزن بيموت..عشان  أنت اللي خلقته و إنت اللي قادر تخففه..

يارب أنا زي يعقوب بشكيلك بثي و حزني..و عيزاك زي ما رجعتله يوسف ترجعلي الشخص الوحيد اللي حبيته في العالم..أنت اللي بتقلب القلوب..وأنت اللي ماسكها في إيديك..قلب قلبه على حبي..و اضغط بإيدك الرحيمة ضغطة حنية واحدة ..و اعطيه القدرة على نسيان غلطاتي..زي ما عطيتني القدرة على إني مشوفهاش أصلاً..و أعطيه القدرة على المجازفة..زي ما عطتني القدرة على الرضا..و انصرني ياربي في حبي..انت اللي مبتحبش الإنهزام..وأنت اللي بتشمل المحبين برحمتك..لأنك طاقة حب..و لأنك كنت كنز مخفي..و عارف إن الحب هو الكنز الوحيد المخفي في أرواح البني آدمين..

أنت السبب الوحيد اللي بيجمع بين اى اتنين بيحبوا بعض..ولو افترقوا بيبقى لحكمة من عندك..و لما بيحصل بيبقى بإرادتهم الحرة اللي إنت خلقتها فيهم..عمر الحب ما كان بالإجبار..ولا كان بالاختيار..ولا كان بحساب المزايا و العيوب..

يارب أنت وحدك اللي عالم بالوجع لانك أنت اللي خالقه..محدش حاسس بيا ولا مصدق إن الوجع بيموّت الروح غيرك..لأنك انت اللي خالق الروح..و أنت وحدك اللي قادر تخفف الوجع ده..وأنت وحدك اللي قادر تجيبلي ترياقه..

يارب أنا عارفة إنك مبتعملش إلا الخير لعبيدك حتى لو  مش راضي عنهم..بس طالبة منك إنك تديني يارب فرصة الاختيار..و دخلني في التجربة حتى لو كنت خايف عليا منها خوف الأب على بنته من خروجها لوحدها للدنيا الزحمة لأول مرة..ولما أنكسر هاجيلك أبكيلك فهتقومني..ولو أنتصرت..أنت الوحيد اللي هشكرك و هحمد فضلك..

يارب انا اللي عمري ما عبدتك من باب الخوف أبداً..و كنت ليا باب حب بيخلي قلبي يترعش لما بقول اسم من اسماءك..لما بقرا كلمة من كلامك..لما بحس بعطفك على الناس في الشوارع..لما بشوف إيدك ممدودة لكل واحد و كل روح..و في كل شارع..وكل بيت..ساعدني ياربي في حبي لمخلوقاتك..و متغيرش عليا من حبي لأى حد غيرك لأنه عمره ما هيكون زيّ حبي ليك..و مد ليا كف الرحمة و انصفني يارب..و عالجني من زلاتي ..و غير من طباعي الغلط..و عطيني القدرة على الصبر..و لو كنت رخصت نفسي الغالية لإنك إنت اللي خلقتها بقلة ثقتي في نفسي..سامحني..و رجعلي الثقة تاني في الدنيا و العدل و بنفسي و بكل اللي حواليا..

يارب اغفر لي ألمي و ضعفي و هواني على الناس..و اغفرلي يأسي و حزني و انكساري..و مدلي إيدك..و استجب..يارب استجب..يارب استجب