الساعة الأولى

النهاردة قررت أنزل ..بقالي كتير أوي منزلتش..بقالي كتير حتى مسرحتش شعري..كنت نايمة طول اليوم زى كل يوم..عايزة اليوم يعدي بسرعة ممكن الدنيا تعدي بسرعة أو ممكن افضل نايمة لحد ما القيامة تقوم..قمت لبست و حطيت شابوه على شعري المنكوش و نزلت..وقفت تاكسي كان في ست و بنتها راكبين ورا..الست نزلت تركب هى قدام غالبا نازلة الأول و انا كان معايا واحدة كمان..كان في اتنين كعادة الغلاسة المصرية رايحيين يهجموا على التاكسي بغض النظر انهم شايفني وانا بوقفه..قلت للمدام دي يا مدام أنا موقفاه..ردت من غير ما تبصلي انا وقفته الاول..و رايحه بتزاحم الست اللي كانت راكبة أصلا..صاحب التاكسي قال للمدام و الراجل يا سادة انا واقف للمدموازيل..فتراجعوا اخيرا..اللي لفت انتباهي ان الست اللي كانت راكبه معملتش رد فعل للمزاحمة السخيفه بتاعة المدام..لما ركبت السواق فضل يكلمها مبتردش..و بعدين لاحظت فشاورتله انها مش بتسمع ومش بتتكلم..و بكل بساطة شاورت لبنتها اللي متتجاوزش 5 سنين عشان تقولها هو بيقول ايه..البنت الصغيره كلمتها بلغة الأشارات و فهمتها ..قام السواق قالها امال مين اللي قالي على اسم الشارع..ٌالبنت الصغيرة قالتله انا اللي قلت يا عمو و ضحكت..و ترجمت لمامتها..أنا عجبني المشهد ده قوي..حسيت أن البنت الصغيرة تأقلمت على طول مع وضع مامتها و اتعلمت لغتها و فهمت الفرق بين انها بتسمع و ان امها ربنا ممنش عليها بالنعمة دي بحكمته..و عجبني قدرة الأنسان أنه يتأقلم مع أى وضع..مش عارفه ليه فكرت و أنا في التاكسي فيك..و حسيت اني كان لازم اعمل شوية جُهد معاك اكتر من كده..ممكن أنا خفت من اني مقدرش أتأقلم مع الدنيا بتاعتك..ومع أهلك و مع أصحابك..ونسيت أن الإنسان بيتأقلم لو هو حابب 

ده..أنا بفكر كتير أني مش مبسوطة دلوقت..وأني كنت هبقى مبسوطة أكتر لو فضلنا مع بعض..بس إحساس عدم التحديد اللي أنا فيه مشتتني..ممكن الوقت يبين بالضبط أنا عايزة ايه..كمية الضغط والكلام من الناس الكتير حواليا ليها أثرها بردو..ممكن كل ده يتلاشى و أكتشف أني مقدرش أعيش من غيرك..وممكن أفهم ان كل ده قدريات و حاجة مترتبه علشان ملناش نصيب مع بعض..في التاكسي وأنا راجعه السواق كان مشغل الراديو..كان المونولوج بتاع صلاح جاهين..أنا دبت و جزمتي نعلها داب..من كتر التدوير على الأحباب..مع انه دمه خفيف و صلاح جاهين بيغنيه بكوميديا بس أنا دمعت ..ممكن علشان أنا معذب...و متيم....وجريح..

http://www.youtube.com/watch?v=MMKDX7S0zVM